Կարասի հաջողության հայկական բանաձևը. բիզնես՝ մեկնարկած 200 դոլարով

<p><strong><img alt="" src="https://www.karas.am/media/wysiwyg/2016-karas_founders_372840361.jpg" style="width:734px"><br>Հայաստանյան ռեստորանային և արագ սննդի սպասարկման ոլորտում ԿԱՐԱՍ ընկերությունը գործում է արդեն ավելի քան 10 տարի: Այս ժամանակահատվածում ընկերությունն առաջիններից մեկը Հայաստանում գործարկել է սեփական առաքման ծառայությունը, իրականացրել է ռեբրենդինգ՝ փոխելով շուկայի նպատակային սեգմենտը, ինչպես նաև ակտիվ համագործակցել է Վերակառուցման և Զարգացման Եվրոպական Բանկի (ՎԶԵԲ) հետ: ԿԱՐԱՍ-ի բիզնես հաջողության գաղտնիքների և առաջիկա պլանների մասին «Բիզնես 24»-ը զրուցել է ԿԱՐԱՍ ազգային սննդի ցանցի երկու հիմնադիրների՝ Տիգրան Յուզբաշյանի և Աշոտ Հարությունյանի հետ:</strong><br><br><strong>Բիզնես 24. - ԿԱՐԱՍ-ը Հայաստանում հաջողված բիզնեսի լավագույն օրինակներից մեկն է: Կներկայացնե՞նք ընկերության հաջողության գրավականը: Ո՞րն է այսօր ԿԱՐԱՍ-ի տեսլականը:</strong><br><br>Տիգրան Յուզբաշյան.&nbsp;- Հիմնադրվելով 2005 թվականին՝ ԿԱՐԱՍ-ն իր ակտիվ զարգացումը սկսեց 2009-2010 թվականներից, երբ արդեն բավականաչափ արհեստավարժ էինք, ծանոթ շուկայի պահանջներին և առաձնահատկություններին: Մեր հաջողության գրավականն այն է, որ անդադար աշխատել ենք ընկերության զարգացման և ընդլայնման ուղղությամբ, միշտ բաց ենք եղել նորամուծությունների համար: Բազմաթիվ ծրագրեր ենք իրականացրել զարգանալու և շուկայում մրցակցությանը դիմակայելու համար: Մեր ընկերությունը միշտ աշխատել, աշխատում և շարունակելու է աշխատել առողջ մրցակցության պայմաններում, և իրականացնելով զարգացման նոր ծրագրեր՝ ձգտելու ենք պահպանել շուկայում առաջատար դիրք: Այսօր ընկերության տեսլականն է՝ ԿԱՐԱՍ-ը բոլորի համար: Այսինքն, ռեստորանային և արագ սննդի սպասարկման հայաստանյան ոլորտում լինել այնպիսի ընկերություն, որը կսպասարկի հասարակության գրեթե բոլոր շերտերին:<br><br><strong>Բիզնես 24. - Ըստ վերջին վիճակագրական տվյալների՝ մեր երկրում տնտեսական ակտիվության ցուցանիշի աճի տեմպերի անկում է: Ինչպե՞ս է սա անդրադառնում ընկերության գործունեության վրա: Ընդհանուր առմամբ, ինչպե՞ս կգնահատեք մեր երկրի տնտեսական վիճակն ու բիզնես միջավայրը:</strong><br><br>Աշոտ Հարությունյան.&nbsp;- Մենք շատ ենք սիրում մեր երկիրը: Սա բիզնեսում ամենակարևորն է: Մենք միշտ ասել ենք, որ գործարարներս պետք է անենք հնարավոր ամեն բան, որ մեր երկիրը ծաղկի: Յուրաքանչյուրիցս է կախված, որ տնտեսական անկումը փոխենք աճի: ԿԱՐԱՍ-ին հաջողվել է քրտնաջան աշխատանքի շնորհիվ դառնալ շուկայի առաջատարներից մեկը: Մենք երկու ընկերով ենք հիմնադրել ԿԱՐԱՍ-ը և մեր ուժերով ենք հասել հաջողության: Մեր բիզնեսը մենք սկսել ենք 200 դոլարով և այսօր արդեն ոլորտում առաջատարներից մեկն ենք: Մեր օրինակով մենք ապացուցում ենք, որ Հայաստանում հնարավոր է ստեղծել մրցունակ բիզնես և հասել հաջողության: Ես կոչ եմ անում բոլորին հնարավորինս օգտվել ազգային արտադրողներից, որով կուժեղացնենք թե մեր տնտեսությունը, թե մեր երկիրը: Ինչ վերաբերում է տնտեսական աճի տեմպերի անկմանը, ապա այն ԿԱՐԱՍ-ի գործունեության վրա բացասական ազդեցություն չի թողել: 2016 թվականին մենք ունենք նույն ցուցանիշներն, ինչ 2015 թվականին: Տնտեսական անկման պայմաններում հասարակական սննդի ոլորտում միշտ էլ պահանջարկ կա: Ճգնաժամի պայմաններում էլ մարդիկ շարունակում են ընդմիջումներ անել, տոնել միջոցառումները և այլն:<br><br><strong>Բիզնես 24. - Մի քանի ամիս առաջ ընկերությունը հայտարարեց ՎԶԵԲ-ի հետ 1.5 տարվա համագործակցության արդյունավետ ավարտի և HACCP որակի չափանիշների ներդրման մասին: Եթե կարելի է՝ մանրամասնեք այս համագործակցության նպատակները և արդյունքները: Ի՞նչ է ենթադրում HACCP որակի չափանիշների ներդրումը:</strong><br><br>Տիգրան Յուզբաշյան.&nbsp;- Վստահ կարող եմ ասել, որ մեր ընկերության զարգացման գործընթացում ՎԶԵԲ-ի հետ համագործակցությունը եղել է բավականին հաջողված: Համագործակցել ենք բիզնեսի կառավարման և ընդլայնման բոլոր ուղղություններով, այդ թվում՝ մարքեթինգ, կադրային քաղաքականություն, ֆինանսներ, որակի վերահսկում և այլն: Սկզբնապես ՎԶԵԲ-ի հետ համագործակցության ծրագիրը նախատեսված էր 1 տարի ժամկետով, սակայն համագործակցության ընթացքում ՎԶԵԲ-ը շատ հետաքրքրվեց մեր բիզնեսով՝ համարելով այն ամենահաջողվածներից մեկը, և իրենց նախաձեռնությամբ ծրագիրը երկարեց՝ տևելով ավելի քան մեկ ու կես տարի: Լինելով բավականաչափ տեղեկացված և ունենալով աշխատանքի բավականին մեծ փորձ այս ոլորտում՝ ես և Աշոտ Հարութունյանը, որպես ԿԱՐԱՍ-ի երկու հիմնադիր և սեփականատեր, միշտ պատրաստ ենք լսել ճիշտ խորհուրդներ: Այս հարցում ՎԶԵԲ-ը շատ օգտակար եղավ: Համագործակցության ամենակարևոր արդյունքը HACCP որակի չափանիշների ներդրումն է: Այս չափանիշները սահմանված են հիմնականում Կանադայի, ԱՄՆ-ի և եվրոպական երկրների ռեստորանային և արագ սննդի սպասարկման ոլորտում գործող ընկերությունների համար, և հպարտությամբ կարող եմ ասել, որ մեր տարածաշրջանում և ԱՊՀ երկրներում գործող շատ քիչ ընկերություններ են իրականացնել նման չափանիշների ներդրում: HACCP որակի չափանիշների ներդրմամբ փաստաթղթավորվել է ընկերության ամբողջ գործունեությունը: Այսինքն, ունենք մանրամասն գրված փաթեթ՝ ընկերության գործունեության յուրաքանչյուր ուղղության մասին, թե ինչպես պետք է կազմակերպվեն և իրականացվեն բոլոր աշխատանքները՝ կադրային, որակային, դիզայն և այլն: Այս չափանիշների ներդրումը նպաստում է ընկերության բոլոր բաժինների աշխատանքի արդյունավետության բարելավմանը, ինչպես նաև ֆրանչայզինգի մոդելի մշակմանը: Մենք բազմաթիվ առաջարկներ ենք ստացել այլ երկրներից համագործակցել հենց ֆրանչայզինգի մոդելով, և HACCP որակի չափանիշների ներդրման շնորհիվ այժմ մենք գրեթե պատրաստ ենք դրան:<br><br><strong>Բիզնես 24. - Ինչպե՞ս կգնահատեք շուկայում մրցակցությունը: Որո՞նք են ԿԱՐԱՍ-ի մրցակցային առավելությունները:</strong><br><br>Աշոտ Հարությունյան.&nbsp;- Մենք ողջունում ենք առողջ մրցակցությունը և շուկայում մրցակցության դիմակայելու ու առաջատարի դիրքում լինելու համար շարունակ իրականացնում ենք նոր ծրագրեր, ինչպես օրինակ՝ ռեբրենդինգը, ՎԶԵԲ-ի հետ համագործակցությունը և այլն: Մենք բաց ենք նոր մտքերի և նախաձեռնությունների համար: Սա մեր մրցակցային առավելություններից մեկն է: Բացի այդ, մենք ծածկում ենք շուկայի մեծ սեգմենտ: ԿԱՐԱՍ-ից օգտվում է երիտասարդությունը, զբոսաշրջիկները: Մեզ մոտ գալիս են ընտանիքներով, միջոցառումների համար նախատեսված սրահներում նշվում են տարբեր տոներ: Մենք առաջարկում ենք ոչ միայն տեղում սպասարկում, այլ նաև Take away և առաքման ծառայություն: ԿԱՐԱՍ-ի ռազմավարության հիմքում ընկած է բարձր որակ և ցածր գին քաղաքականությունը: Մեր նպատակն է հասանելի լինել հասարակության առավել լայն հատվածին: Այսօր մեր ցանցը սպասարկում է ամսական 200-250 հազար հաճախորդ:<br><br><strong>Բիզնես 24. - Անցյալ տարի ընկերությունը մեկնարկեց «Սահմանն իմ հոգում» բարեգործական ծրագիրը: Կներկայացնե՞ք ծրագրի ընթացքը:</strong><br><br>Տիգրան Յուզբաշյան.&nbsp;- «Սահմանն իմ հոգում» բարեգործական ծրագիրն ընկերության կարևոր նախաձեռնություններից մեկն է, որի շուրջ բոլորն աշխատում են մեծ ոգևորվածությամբ: Այն ոչ թե օգնություն է, այլ մեր շնորհակալությունն է սահմանամերձ գյուղերում ապրող մարդկանց: Ներկա պահին ծրագրի շրջանակներում սահմանամերձ գյուղերի դպրոցներում ընկերության ֆինանսավորմամբ գործում են ձեռագործության խմբակներ: Շուտով մեր ցանցի մի քանի մասնաճյուղերում կստեղծվեն ցուցահանդես-վաճառքի անկյուններ, որտեղ կներկայացվեն երեխաների ձեռագործ աշխատանքները, իսկ դրանց վաճառքից ստացվող գումարները կուղղեն գյուղերում իրականացվող ծրագրերի ֆինանսավորմանը: Բացի այդ, մենք նաև «Սահմանն իմ հոգում» ծրագրի շրջանակում մտադիր ենք աջակցել սահմանի բնակիչներին նաև գյուղարտադրանքի իրացման հարցում:</p><p><img alt="" src="https://www.karas.am/media/wysiwyg/5_277208737.jpg" style="width:734px"></p><p><img alt="" src="https://www.karas.am/media/wysiwyg/2_108698082.jpg" style="width:734px"></p><p><img alt="" src="https://www.karas.am/media/wysiwyg/1_855175871.jpg" style="width:734px"></p><p><img alt="" src="https://www.karas.am/media/wysiwyg/6_524090241.jpg" style="width:734px"></p><p><img alt="" src="https://www.karas.am/media/wysiwyg/4_220585467.jpg" style="width:734px"></p><p>&nbsp;</p>